मुम्बई– बलिउड निर्देशक नितेश तिवारी नयाँ फिल्म ‘रामायण’को तयारीमा छन् । यो फिल्मलाई बलिउडको प्रतिक्षित प्रोजेक्ट मानिएको छ ।

बलिउड लाइफका अनुसार फिल्मका निर्माता मधु मेन्टाना फिल्ममा राम्रो लगानी गर्ने सोचमा छन् । फिल्ममा ऋतिक रोशन ‘रावण’को चरित्रमा देखिँदैछन् भने साउथ सुपरस्टार महेश बाबु भगवान ‘राम’को भूमिकामा देखिँदैछन् ।

फिल्मका लागि अनुबन्धित फाइनल भइसकेका छैनन् । यसअघि अभिनेत्री दीपिका पादुकोणको नाम चर्चामा आए पनि अहिले निर्माताको नजर करिना कपूर खानतिर सोझिएको छ । यद्यपि करिना र दीपिका दुवैले ‘सीता’को चरित्र निभाउन आफ्नो दाबेदारी प्रस्तुत गरिरहेका छन् ।

निर्माताहरु यी दुई अभिनेत्रीमध्ये कोही एकलाई ‘सीता’को भूमिकाका लागि अनुबन्धित गर्नेछन् । भारतमा हालका दिनमा रामायणमा आधारित कैयौं फिल्म बनिरहेका छन् । जसमा नितेशको फिल्म पनि एक हो ।

निर्माण पक्षले कोभिड महामारीको समाप्तिसँगै स्टारकास्टको घोषणा गर्ने योजना बनाएका छन् ।