मुम्बई– भारतीय अभिनेता ऋतिक रोशन अभिनयसँगै आफ्नो दयालुपनका लागि पनि चिनिन्छन् ।

उनका सह–कलाकारहरु जहिल्यै पनि ऋतिकको मानवीय भावनाको तारिफ गर्छन् । उनको उदारतालाई विगत दुई दशकमा साथी र सहकर्मीले नजिकबाट नियाल्ने मौका पाएका छन् ।

यो सूचीमा अभिनेत्री प्रियंका चोपडा पनि छिन् । उनले ऋतिकसँग फिल्म ‘कृष(२००६)’, ‘अग्निपथ(२०१२)’ र ‘कृष ३(२०१३)’मा अभिनय गरिसकेकी छन् ।

अभिनेत्री प्रियंकाले आफ्नो आत्मकथा ‘अनफिनिश्ड’मा ऋतिकले आफूलाई देखाएको मानवीय भावनाको कुरा उल्लेख गरेकी छन् ।

उनले सन् २०१३ मा आफ्नो पिता अस्वस्थ हुँदाको अवस्थामा ऋतिकले गरेको सहयोगलाई स्मरण गरेकी छन् ।

प्रियंकाका अनुसार पिता डा. अशोक चोपडा गम्भीर बिरामी हुँदा उनी फिल्म ‘कृष’को सुटिङमा व्यस्त थिइन् । सुटिङका समयमा ऋतिकले प्रियंकाको पिताको स्वास्थ्य अवस्थाबारे थाहा पाए ।

‘मेरो पितालाई विदेशी अस्पतालमा लानुपर्ने थियो । यो कुरा थाहा पाएपछि ऋतिकले एयर इण्डियामा आफ्नो सम्पर्कलाई प्रयोग गरेर पितालाई लण्डन उडाउने व्यवस्था गरे’, उनले लेखेकी छन् ।

ऋतिकको सहयोगकै कारण लण्डनमा प्रियंकाको पिताको उपचार भएपछि प्रियंकाले ऋतिकलाई ‘सुपरहिरो’ मानेकी छन् ।

‘हाम्रो समाजमा ऋतिक जस्तै सुपरहिरोको आवश्यकता छ । किनकी यस्ता व्यक्तिले अन्य धेरै मानिसलाई बचाउन सक्छन्’, उनले लेखेकी छन् ।
–एजेन्सी