काठमाडौँ– उद्योग, वाणिज्य तथा आपूर्ति मन्त्री लेखराज भट्टले सरकार र निजी क्षेत्र अलग हो भन्ने प्रवृत्ति बदल्नुपर्ने उल्लेख गर्दै निजी क्षेत्रसँगको सहकार्यलाई थप गति र नयाँ उचाई दिन सरकार तत्पर रहेको बताएका छन।

राष्ट्रिय व्यवसायिक पहलको चौधौं वार्षिक साधारण सभाको उद्घाटन गर्दै मन्त्री भट्टले कृषिमा पूँजीको बन्देज र विभिन्न शर्तहरु राखेर वैदेशिक लगानी खुला गरिएको बताए ।

उनले कोभिड–१९बाट परेको प्रतिकूल असरलाई कम गर्न सरकार क्रियाशील रहेकोले व्यवसायीहरुको सुझावलाई कार्यान्वयन गर्न सरकार सदैव तत्पर रहेको जानकारी दिए ।

कार्यक्रममा मन्त्री भट्टले राष्ट्रिय व्यवसायिक पहलद्वाराप्रकाशित कोभिड १९ को प्रभावमा परेका साना, मझौला तथा लघु उद्यमको पुनर्स्थापना गर्न आवश्यक नीतिगत परिमार्जन सम्बन्धि निजी क्षेत्रले अघि सारेका सल्लाह सुझाव सहितको प्रतिवेदन विमोचन गरेका थिए ।

कार्यक्रममा नेपाल उद्योग वाणिज्य महासंघका उपाध्यक्ष दिनेश श्रेष्ठले कोभिडको मार निजी क्षेत्रले बोक्नु परेको बताउँदै दोहोरो कानूनले व्यवसायमा झन्झट थपिएको बताए ।

यसैगरी नेपाल उद्योग परिसंघका उपाध्यक्ष विष्णु अग्रवालले साना व्यवसायले पुनकर्जा पाउन कठिन भएकोले सरलीकरण हुनपर्नेमा जोड दिएका थिए ।

नेपाल साना तथा घरेलु उद्योग महासंघका कार्यबाहाक अध्यक्ष उमेश प्रसाद सिंहले कोभिडबाट सबैभन्दा बढी असर साना तथा घरेलु व्यवसायमा परेकोले त्यसतर्फ सबैको ध्यानकेन्द्रित हुनुपर्ने बताए ।