काठमाडौँ – स्पेनिस ला लिगामा शनिबार राति भएको फरक खेलमा सेभिल्ला र भ्यालेन्सियाले जित निकालेका छन् ।

घरेलु मैदानमा भएको खेलमा भ्यालेन्सियाले इल्चेलाई २-१ अन्तरले पराजित गरेको छ । भ्यालेन्सियाको छैटौँ जितमा गोनकालो गुयडेस र क्रिष्टियानो पिचिनीले १/१ गोल गरे । इल्चेका लुकास बोयले सान्त्वना गोल गरे ।

जितसँगै भ्यालेन्सिया १७ खेलबाट २५ अंक बनाउँदै सातौँ स्थानमा छ । १५ अंक बनाएको इल्चे १६ औँ स्थानमा छ ।

अर्को खेलमा सेभिल्लाले एथ्लेटिको क्लबलाई १-० अन्तरले पराजित गरेको छ । भ्रमणकारी टोली सेभिल्लाको जितमा खेलको ३८औँ मिनेटमा थोमस डेलान्सीले गरेको गोल निर्णायक बन्यो ।

जितसँगै सेभिल्ला १६ खेलबाट ३४ अंक जोड्दै तालिकाको दोस्रो स्थानमा छ । पराजित एथ्लेटिको २१ अंकसहित १०औँ स्थानमा छ ।

ला लिगामा १६ खेलबाट ३९ अंक बनाएको रियल मड्रिड शीर्ष स्थानमा छ ।