मुम्बई(बलिउड लाइफ)– बलिउड अभिनेता शाहरुख खानका छोरा आर्यन खान लागु औषधको मामलामा पक्राउ परेपछि कैयौं बलिउड कलाकारहरुले शाहरुख र उनको परिवारको समर्थन गरेका छन् । आर्यनको जमानतलाई अदालतले अस्वीकार गरिरहँदा शाहरुख र उनकी पत्नी गौरी खान निकै चिन्तित छन् ।

समाचारअनुसार शाहरुख आर्यनका बारेमा सोचेर सुत्न पनि सकेका छैनन् । उनी छोरालाई सम्झेर रातभर जागै बस्छन् । शाहरुख र गौरीले आफ्नो छोराको मामला यति लामो समयसम्म जान्छ भन्ने सोचेका थिएनन् ।

जसै आर्यन पक्राउ परेको खबर सार्वजनिक भयो, शाहरुखले तुरुन्तै देशका राम्रा कानूनविज्ञलाई फोन गरेर यो मामलमा सल्लाह लिएका थिए । उनले सतीश मानेशिन्देलाई पनि फोन गरेका थिए । सतीशले शाहरुखलाई आर्यन चाँडै नै बाहिर आउने आश्वासन दिएका थिए । तर उनको आश्वासन पुरा हुन सकेन ।

अदालतले आर्यनको जमानत निवेदन अस्वीकार गरेपछि शाहरुखको परिवारलाई एउटा ठूलो झड्का लागेको छ । यो कठिन समयमा गौरीका भाई विक्रान्त छिब्बर र उनकी पत्नी नमिता शाहरुखको परिवारसँगै छन् । शाहरुख हाल मुद्धाको विषयमा फलोअप गर्न र एनसीबीसँग आर्यनको अवस्थाबारे सोधपुछ गर्न व्यस्त छन् ।

‘गौरी र शाहरुख दिनभर कैयौंपटक फोन गरेर एनसीबीसँग आफ्नो छोराको स्वास्थ्यको अवस्थाबारे सोधिरहेका छन् । आर्यनसँग परिवारको सिधा सम्पर्क छैन । तर एजेन्सीले आर्यनसँग जोडिएको जानकारी परिवारलाई दिइरहेकोछ । हालैमात्र आर्यनलाई उसको कपडा र घरमा बनाएको खाना दिनका लागि अनुमति मागिएको थियो’, शाहरुख निकट स्रोतले भनेको छ ।