बागलुङ– कारोना संक्रमण दर दिनानुदिन बढ्दै जान थालेपछि बागलुङमा जारी निषेधाज्ञालाई थप कडाई गरिएको छ ।
जिल्ला कोभिड संकट व्यवस्थापन केन्द्र (डिसीएमसी)को मंगलबार बसेको बैठकले साउन २८ गतेदेखि भदौ ५ गतेसम्म कडाएका साथ निषेधाज्ञा गर्ने निर्णय गरेको हो ।

बैठकले साउन २८ गते बिहान ५ बजेदेखि भदौ ५ गते राति १२ बजेसम्म जिल्लाभर निषेधाज्ञा थप कडाइका साथ लागू गर्ने निर्णय गरेको निमित्त प्रमुख जिल्ला अधिकारी गणेश गौतमले बताए ।

निषेधाज्ञाको समयमा सरकारी र गैर सरकारी कार्यालयहरु, बैंक, सहकारी, विमा तथा वित्तीय संस्था, शैक्षिक संस्थाहरु र अतिआवश्यक बाहेकका सार्वजनिक तथा निजी यातायात बन्द गरिने भएको छ । बैठकले अत्यावश्यक खाद्यान्न, आइतबार, बुधबार र शुक्रबार मात्रै बिहान १० बजेसम्म सञ्चालन गर्न दिइने भएको छ । फलफूल, माछामासु तथा दूध ढुवानी र वितरण बिहान १० वजे सम्म सञ्चालनमा आउनेछ ।

जिल्लामा ६०३ जना संक्रिय संक्रमित छन्, भने ६३ जनाको कोरोना संक्रमणका कारण मृत्यु भइसकेको स्वास्थ्य कार्यालयका कोरोना स्रोत व्यक्ति देश प्रकाश घिमिरेले जानाकारी दिए । बागलुङ नगरपालिकाले १० दिन कडा निषेधाज्ञा गर्न जिल्ला कोभिड संकट व्यवस्थापन केन्द्र डीसीएमसीलाई सोमबार सिफारिस गरेको थियो । संक्रिय संक्रमितको आधा संक्रमित बागलुङ नगरपालिकामा मात्रै छन ।