काठमाडौँ– नेकपा एमालेका वरिष्ठ नेता माधवकुमार नेपालले संसद पुनर्स्थापना र शेरबहादुर देउवालाई प्रधानमन्त्री बनाउन सर्वोच्च अदालतको फैसलाको स्वागत गरेका छन् ।

सर्वोच्चको फैसलाको स्वागत गर्दै नेता नेपालले संविधान, संसद र लोकतन्त्रको रक्षा भएको प्रतिक्रिया दिएका छन् ।

पूर्व प्रधानमन्त्री नेपालले भने, ‘सर्वोच्चको फैसलाले लोकतन्त्र र संविधानको रक्षा गरेको छ । सबैलाई नैतिक मूल्य मान्यतामा रहन निर्देशन पनि दिएको छ ।’ अदालतले यस पटक आफ्नो गरिमा बढाएको उनको भनाइ छ ।

संविधानको धारा ७६ (५) अनुसार सरकार गठन गर्दा सांसदलाई दलको ह्वीप नलाग्ने सर्वोच्चले आदेश दिएको छ । नेता नेपालले संविधानमा केही अस्पष्टता रहेको तर त्यो पनि ब्याख्या गरिदिएको बताए ।

यसैबीच माधव नेपालनिकट एमाले पोलिटव्यूरो सदस्य जगन्नाथ खतिवडाले सर्वोच्चको फैसलाले ओली युग समाप्त भएको भन्दै आफूहरूको जित भएको टिप्पणी गरेका छन् ।