काठमाडौंँ- उपप्रधानमन्त्री एवं नेकपा (एमाले)का महासचिव ईश्वर पोखरेलले पार्टीका दिवंगत नेता पशुपति चौलागाईंप्रति श्रद्धाञ्जलि अर्पण गरेका छन् ।

एमालेको थापाथलीस्थित केन्द्रीय कार्यालय पुगेर उपप्रधानमन्त्री पोखरेलले श्रद्वाञ्जलि अर्पण गर्दै निष्ठाका साथ आफ्नो सम्पूर्ण जीवन पार्टीमा बिताउने एकजना अशल गुमाउनुपरेको बताए ।

तीन दिन अघिमात्रै स्वास्थ्यका बारेमा आफूले उनीसँग गरेको कुराकानी अहिलेजस्तो लागिरहेको उल्लेख गर्दै पोखरेलले चौलागाईंसँग लामो समयदेखि रहँदै आएको हार्दिकतापूर्ण सम्बन्धलाई सधैँ सम्झने जनाए ।

कोरोनाका कारण निधन भएका बाग्मती प्रदेशसभा सदस्य चौलागाईंले २०३८ साल मङ्सिर ८ गते पार्टी सदस्यता प्राप्त गरेका थिए ।

उनी पार्टीको तत्कालीन युवा सङ्घका केन्द्रीय अध्यक्ष, नेकपा (एमाले) को दोलखा जिल्ला कमिटी अध्यक्ष, बागमती अञ्चल कमिटी सचिव, इञ्चार्ज हुँदै पार्टीका पोलिटब्युरो सदस्य थिए ।