काठमाडौं– गायक उदेश श्रेष्ठको नयाँ गीत ‘मलाई तिमी मनपर्यो’को भिडियो सार्वजनिक भएको छ । काठमाडौंमा हिजो आइतबार एक कार्यक्रमका बीच गीतको भिडियो सार्वजनिक गरिएको हो ।

गीतमा उदेशसँगै अर्जुन पासवानको शब्द तथा उदेशकै संगीत छ । यो गीत ‘उदेश्य’ गीतिसंग्रहमा संग्रहित छ ।

गायक प्रेमध्वज प्रधान उपस्थित कार्यक्रममा उदेशले लाइभ ब्याण्डसँग प्रेमध्वजकै गीत ‘तारा मात्र होइन तिमीलाई’, ‘घुम्तीमा न आउ है’ गाएका थिए ।

यसबाहेक उनले आफ्नो गीत ‘यो जुनीमा तिम्रो हुन सकिन’, ‘किन मायामा यति धेरै चोट हुन्छ’, ‘तिम्रो लागि आज म धेरै’लगायतका गीत सुनाए ।

सार्वजनिक भिडियोमा उदेशसँगै माङसा लिम्बु, सञ्जल भण्डारी र प्रिया लिम्बु फिचर्ड छन् । भिडियोका निर्देशक छेवाङ लामा हुन् ।