काठमाडौँ- कोरोना भाइरसको संक्रमण फैलन नदिन ट्राफिक प्रहरीले जनचेतनामुलक अभियान शुरू गरेको छ ।

दोस्रो लहरको संक्रमण बढेपछि महानगरीय ट्राफिक प्रहरी महाशाखाले नेपाल यातायात व्यवसायी राष्ट्रिय महासंघको सहकार्यमा कोरोना भाइरस रोकथामका लागि जनचेतनामूलक अभियान शुरू गरेको हो ।

पुरानो बसपार्कबाट आज शुरू गरिएको उक्त अभियानको नारा ‘ट्राफिक प्रहरीको चाहना, स्वस्थ र सकुशल यात्राको कामना’  रहेको छ ।

उक्त कार्यक्रममा बोल्दै ट्राफिक महाशाखाका प्रमुख प्रहरी वरिष्ठ उपरीक्षक जनक भट्टराईले विश्वमा नै माहामारीको रूपमा फैलिरहेको कोभिड १९ विरूद्ध समयमै सजगता र सचेतना फैलाउन यस जनचेतनामूलक अभियान फलदायी हुने अपेक्षा गरे ।

कोभिड १९ बाट यातायात क्षेत्र उच्च जोखिममा रहेकाले बेलैमा सुरक्षाका उपाए अपनाएर मात्र चलायमान गराउनुपर्नेमा उनले जोड दिए ।

कार्यक्रममा नेपाल यातायात व्यवसायी राष्ट्रिय महासंघका अध्यक्ष योगेन्द्र कर्माचार्य र महासचिव सरोज सिटौलाले यातायात क्षेत्रलाई कोरोना भाइरसबाट कसरी सुरक्षित रहने भन्ने धारणा राखे ।

उनीहरूले सम्पूर्ण चालक, सहचालक तथा यात्रुहरूलाई अनिवार्य रूपमा मास्क लगाई भौतिक दूरी कायम गरेर मात्र सवारी साधनको प्रयोग गर्न आह्वानसमेत गरेका छन् ।

कार्यक्रममा यातायात व्यवसायीहरू, मजदुर संघ र युनियनका पदाधिकारीहरू, ट्राफिक प्रहरीका उच्च अधिकृत तथा जवानहरूले सवारी साधनहरूमा यात्रुले देखिने गरी सवारीको ढोका नजिक स्टिकर टाँसेर पैदलयात्री, सवारी चालक तथा यात्रुहरूलाई सर्जिकल मास्क वितरण गरेका थिए ।

कोरोना भाइरसबाट यात्रुमाथि हुने जोखिमलाई मध्यनजर गरी उपत्यकाका मुख्य मुख्य बसपार्क एवम् भिडभाड हुने क्षेत्रमा नागरिकलाई सचेतना जगाउने तथा सवारी साधनहरुमा हुने भिडभाड कम गराउन महाशाखाले विभिन्न कार्यक्रमहरू पनि सञ्चालन गरिरहेको छ ।