काठमाडौँ– धरानमा आयोजना हुँदै आएको बुढासुब्बा गोल्डकपको २३औँ संस्करण यस वर्ष नहुने भएको छ ।

कोरोना महामारीका कारण आर्थिक सहयोग जुट्न नसक्दा विगत २२ बर्षदेखि निरन्तर हुँदै आएको बुढासुब्बा गोल्डकपको २३ औं सँस्करण यसपटक नहुने भएको हो ।

आयोजक धरान फुटबल क्लबले शुक्रबार पत्रकार सम्मेलन गर्दै २३ औं सँस्करण आयोजना गर्न नसक्ने जानकारी दिएको हो । २०५५ सालदेखि शुरू भएको बुढासुब्बा गोल्डकप पहिलोपटक रोकिएको हो ।

द्वन्द्वकाल, मधेश आन्दोलनजस्ता बिषम परिस्थितिमा पनि विगतमा यो प्रतियोगिता निरन्तर आयोजना भएको थियो । प्रतियोगिताको कुल बजेटमध्ये ७५ प्रतिशत दाताहरुबाट नै संकलन हुने गरेको र बाँकी २५ प्रतिशत प्रायोजक, सहप्रायोजकबाट पाउँदै आएको अवस्थामा यसपटक त्यो अवस्था नरहेको क्लबले जनाएको छ ।

क्लबले गत बर्षको २२ औं सँस्करणको विजेता र उपविजेताको पुरस्कार राशी पनि सबै दिन नसकेको क्लबले जनाएको छ । प्रदेश १ सरकारबाट आउने भनिएको १० लाख र राष्ट्रिय खेलकुद परिषदबाट आउने ५ लाख बजेट पहिलो र दोस्रो हुने टिमलाई उपलब्ध गराउने भनिएको थियो ।

तर, ती दुवै निकायबाट बजेट अहिलेसम्म प्राप्त नभएकोले विजेता मनाङ मर्स्याङ्दी क्लबलाई २ लाख ५० हजार मात्र दिइएको र उपविजेता नेपाल पुलिस क्लबलाई पनि पुरस्कार राशी ५ लाख हालसम्म उपलब्ध गराउन नसकेको क्लबले जनाएको छ ।