काठमाडौँ– वरिष्ठ पत्रकार सुशील शर्माको ६३ वर्षको उमेरमा शुक्रबार निधन भएको छ।

उनले एक वर्षअघि फिस्टुलाको शल्यक्रिया गराएका थिए । रोग पूर्णरुपमा निको नभई समस्या भोगिरहेका उनको आज निधन भएको पारिवारिक स्रोतले जनाएको छ ।

तीन दिनदेखि उनी चावहिलस्थित ओम अस्पतालमा उपचाररत थिए ।

राइजिङ नेपाल, काठमाडौँ पोष्ट, स्पोटलाइट र बीबीसी नेपाली सेवामा लामो समयसम्म पत्रकारिता गरेका वरिष्ठ पत्रकार शर्माले नेपाल वातावरण पत्रकार समूहका कार्यसमितिमा रही केही समय योगदान पुर्‍याएका थिए ।

आफूमात्र होइन, पत्रकारिता क्षेत्रमा लाग्ने सबै व्यक्ति मेहनती र इमान्दार हुनुपर्छ भन्ने मान्यतामा प्रतिबद्ध रहेका उनी मिलनसार, देखेको कुरा भन्ने र लेखेका कुरामा अडिग स्वभाव रहेको उनका समकक्षी वरिष्ठ पत्रकार तीर्थ कोइराला स्मरण गरे ।  शर्माका एक छोरा र श्रीमती छन्।