काठमाडौँ– कञ्चनपुरको भीमदत्त नगरपालिकाको शिक्षा शाखामा विगत २४ दिनदेखि तालाबन्दी गरिएको छ ।

शिक्षा शाखा समितिको गत असार ३१ गते बसेको वैठकले शिक्षक दरबन्दी मिलान गर्ने निर्णय गरेपछि नेपाल शिक्षक संघमा आवद्ध शिक्षकहरुले विभिन्न माग राख्दै साउन ३ गतेबाट शाखा कार्यालयमा तालाबन्दी गरेको शिक्षा शाखा प्रमुख हरिदत्त जोशीले बताए ।

शिक्षकहरुले तालाबन्दी गर्नुका साथै शाखा कार्यालय अगाडि धर्ना पनि दिइरहेका छन् । तालाबन्दीसँगै धर्ना दिएका शिक्षकहरुले साउन १८ देखि रिले अनसनमा समेत गरेका छन् । शिक्षा तथा मानव स्रोत विकास केन्द्रको शिक्षक दरबन्दी मिलान कार्यविधि २०७६ विपरित मनपरी ढंगले दरबन्दी मिलान गरेको भन्दै उनीहरु आन्दोलित भएका हुन् ।

शिक्षा शाखा प्रमुख जोशीका अनुसार लामो समयदेखि शाखामा तालाबन्दी हुँदा दैनिक काममा समेत असर परेको छ । पटक पटक छलफलमा बस्दा पनि शिक्षकहरुको माग सम्बोधन गर्न नसकिएको उनले बताए ।

ऐन नियम अनुसार शिक्षक दरबन्दी मिलान गरेपनि शिक्षकहरुले सरुवा तथा पदस्थापनमा चित्त नबुझाएकाले आन्दोलन गरेका उनले बताए । दरबन्दी मिलान गर्दा केही शिक्षकलाई पाएक पर्ने ठाँउ नपरेकाले शिक्षहरु आन्दोलनमा उर्तिएको उनको आरोप छ ।

शाखामा तालाबन्दी गर्दा शिक्षकहरुको कार्य सम्पादन मुल्यांकन, शिक्षकहरुको तलब लगायत अन्य काममा पनि प्राभाव परेको उनले बताए । नगरपालिकाको नयाँ भवन बनेकाले शाखा सार्ने काम पनि तालबन्दीकै कारण रोकिएको उनको भनाइ छ ।