काठमाडौँ– काठमाडौँ उपत्यकाको खोप अभियान प्रभावकारी नभएको गुनासो परेपछि जिल्ला प्रशासन कार्यालयले अनुगमन गरेको छ ।

प्रशासन कार्यालयको अनुगमन टोलीले शुक्रबार काठमाडौँको ग्रान्डी र अल नेपाल अस्पताल पुगेर अनुगमन गरेको हो । ६० देखि ६४ वर्ष उमेरसमूहका व्यक्तिहरूलाई खोप लगाउन शुरू गरिएपछि पहुँचका आधारमा अन्य उमेरका व्यक्तिलाई पनि खोप दिएको उजुरी परेपछि अनुगमन गरिएको काठमाडौँका सहायक प्रमुख जिल्ला अधिकारी जनकराज भट्टले जानकारी दिए ।

उनले अनुगमनका क्रममा ६० देखि ६४ वर्ष उमेरसमूह बाहेकका व्यक्तिलाई खोप दिएको नपाइएको जिकिर गरे । त्यस्तै उनले खोप अभियानलाई प्रभावकारी बनाउन निरन्तर अनुगमन गरिने जानकारी दिए ।

सरकारले ६० देखि ६४ वर्ष उमेरसमूहका लागि खोप अभियान सञ्चालन गरेको हो । तर खोप सकिएको भन्दै काठमाडौँ महानगरद्वारा खोप अभियान स्थगित गरिएको छ । उपत्यकाका अन्य नगरमा भने खोप कार्यक्रम जारी छ ।