दोहा- गैरआवासीय नेपाली संघ (एनआरएनए) मध्यपूर्वले ६ सय अक्सिजन सिलिन्डर नेपाल पठाउने भएको छ ।

नेपालमा अस्वाभाविक रूपमा फैलिएको कोरोना महामारी र महामारीका कारण जनमानसमा देखा परेको विषम परिस्थितिलाई मध्यनजर गर्दै ६ सय अक्सिजन सिलिन्डर नेपाल पठाउन लागेको हो।

एनआरएनए मध्यपूर्वबाट कोभिड -१९ विषम परिस्थितिमा सिंगो ‘मध्यपूर्वका नेपालीको अभियान, ६ सय अक्सिजन सिलिन्डर मार्फत दैनिक १२ सय नेपालीलाई जीवनदान’ भन्ने मूल नाराका साथ सहयोग गर्न लागेको यस अभियानका संयोजक तथा एनआरएनएका सचिव राजेन्द्र कुमार शर्माले बताए ।

६ सय थान अक्सिजन सिलिन्डर ओमान हुँदै अबको एक हप्तामा नेपाल पठाईने संयोजक शर्माले भर्चुल माध्यमबाट भएको पत्रकार सम्मेलन जानकारी दिए ।

५५० अक्सिजन सिलिन्डर तयार भैसकेको र बाँकी ५० पनि जम्मा गर्ने काम भईरहेको तथा नेपाल पठाउनको लागि कार्गो विमान कुराकानी भईरहेको एनआरएनए ओमानका अध्क्षय विकल झाले बताए ।

अक्सिजन सिलिन्डर नेपाल पठाउन ओमान सरकारको अनुमति लिनु पर्ने भएकाले यसको सम्पूर्ण काम नेपाली राजदूत शर्मीला पराजुली ढकालले गरिरहेकाले चाँडै कानुनी प्रक्रिया पुर्‍याएर स्वदेश पठाइने अध्यक्ष झाले बताए ।

नेपाल सरकारको तर्फबाट स्वास्थ्योपचारमा पहल हुँदाहुँदै पनि कोरोना भाइरस तीव्र रुपमा बढिरहँदा बिरामीले अस्पतालमा शय्या नपाउँदा मृतकको सङ्ख्या दिन प्रतिदिन बढीरहेकाले सहयोग अति आवश्यक रहेको एनआरएनए केन्द्रीय प्रबक्ता डिबी क्षेत्रीले बताए ।

एनआरएनए मध्यपूर्व उपसंयोजक राजेन्द्र अर्यालले यो अभियान एनआएनएको मात्र नभएर मध्यपूर्वमा रहेका करिव २० लाख नेपाल तथा विभिन्न संघसस्थाहरुको पनि रहेको भन्दै महामारीमा सहयोग गर्न सम्पूर्ण नेपाली समुदायलाई अनुरोध गरेका छन् ।