काठमाडौँ – राष्ट्रपति विद्यादेवी भण्डारीले वितरण गरेको विभूषणमा नेपालको नयाँ नक्शा नराखेको विरोधमा माइतीघरमा प्रदर्शन गरिएको छ ।

नेकपा एमालेको माधव नेपाल समूहका विद्यार्थीले चुच्चे नक्शाको ठाउँमा पुरानै नक्शा अंकित गरिएको विरोधमा प्रदर्शन गरेका हुन् ।

लिपुलेक र लिम्पियाधुरासहितको नक्शा बोकेर नेपाल समूह निकटको अनेरास्ववियूले माइतीघरमा प्रदर्शन गरेको हो ।

उनीहरूले झूटो नक्शा चाहिन्न, चुच्चे नक्शा फेर्न पाइन्न, चुच्चे नक्शा खै जस्ता नारा लगाएका थिए । २०७६ सालमा घोषणा गरिएको विभिन्न विभूषण तथा पदक राष्ट्रपति विद्यादेवी भण्डारीले गत शुक्रबार प्रदान गरेकी थिइन् ।

तर उक्त पदकमा लिपुलेक र लिम्पियाधुरासहितको नक्शा नभई नेपालको पुरानै नक्शा राखिएको थियो । सरकारले भने पदक घोषणा गत वर्ष भएकाले त्यही समयमा प्रचलनमा रहेको नक्शा राखेको बताउँदै आएको छ ।

राष्ट्रपतिले वितरण गरेको विभूषणमा नेपालको पुरानै नक्शा अंकित गरिएपछि सर्वत्र आलोचना भइरहेको छ ।