काठमाडौँ– नेपाली सेनाले कंगोमा जवानमाथि कुटपिटमा संलग्न अधिकृतलाई कारबाही गरेको छ ।

सैनिक अदालतले ९ जना सेनाका अधिकारीहरुलाई कारबाही गरेको छ । त्यसमा तीन जना अधिकृत रहेका छन् भने ६ जना अन्य दर्जाका रहेको सैनिक स्रोतले जानकारी दियो ।

तल्लो दर्जाका सैनिक अधिकृतहरुलाई कुटपिट गर्ने तीन जना सैनिक अधिकृतहरुलाई एक वर्ष बढुवा रोक्का गर्ने निर्णय गरेको छ ।

गत असोज ८ गते कंगोमा सह–सेनानी इन्द्र थापा, सुवास हुमागाई र योगेन्द्र धितालले सैनिक जवान नवराज माझीलाई मरणासन्न हुने गरी कुटपिट गरेका थिए ।

मिसनमा खटिएका सैनिक जवानलाई ३ जना क्याप्टेन (सहसेनानी) ले कुटेको फोटो सामाजिक सञ्जालमा भाइरल भएको थियो । छानबिनका लागि जेष्ठ सेनानीको नेतृत्वमा ‘कोट अफ इन्क्वायरी’ समेत गठन गरिएको थियो ।

त्यस्तै नेपाली सेनाबाट जारी गरिएको मिडिया नीति विपरित कार्य गर्ने र अरुलाई पनि भड्काउन प्रयास गर्ने एक जना सैनिकलाई ६ महिना कैदसहित भविष्यमा अयोग्य नठहरिने गरी बर्खास्त गर्ने निर्णय भएको छ ।

साथै सेनाको मिडिया नीति तथा सामाजिक सञ्जाल सम्बन्धी नीति र आचार संहिता विपरित कार्य गर्ने दुई जनालाई दुई वर्ष बढुवा रोक्का, एक जनालाई एक वर्ष बढुवा रोक्का र अर्को जनालाई पनि नसिहत दिइएको छ ।

मादक पदार्थ सेवन गरेर आफू भन्दा माथिल्लो अधिकृतले सुव्यवस्था कायम गर्न दिएको आदेशको अवज्ञा गर्ने एक जनालाई नसिहत दिइएको छ ।

कंगोमा भएको घटनापछि नेपाली सेनाका प्रवक्ता सहायकरथी सन्तोष वल्लभ पौडेलले एक विज्ञप्ति जारी गर्दै सैनिक आचारसंहिता अवज्ञा गर्नेलाई कारबाही गर्ने बताएका थिए ।