काठमाडौँ- प्रमुख प्रतिपक्षी नेकपा एमालेले सार्वजनिक लेखा समितिको सभापतिमा दाबी गरेको छ ।

सिंहदरबारमा आइतबार बसेको समिति बैठकमा एमाले सांसद गोकुल बास्कोटाले संसारभरको संसदीय परम्परा र नेपालको आफ्नै अभ्यासले पनि लेखा समितिको सभापति प्रमुख प्रतिपक्षले पाउनुपर्ने बताएका हुन् ।

चेक एण्ड ब्यालेन्सको लागि पनि सत्तापक्षले लेखा समितिको सभापति छाड्नुपर्ने उनको भनाइ छ । उनले संसार भर नै लेखा समिति प्रतिपक्षीले सम्हाले अभ्यास रहेको जिकिर गरे ।

बैठकमा समिति सभापति भरत शाहले सभापति पद छाड्ने कि नछाड्ने आफ्नो स्वेच्छाको कुरा भएको बताए । शाहले २०५६ सालदेखि नै आफू पनि लेखा समितिमा बस्दै आएको भन्दै २० वर्षको अवधिमा कसैले पनि राजीनामा दिएर गएको आफूलाई थाहा नभएको तर्क गरे ।

बैठकमा महालेखापरीक्षकको ५८ औ वार्षिक प्रतिवेदन, २०७८ बारे छलफल भएको थियो । महालेखापरीक्षक टंकमणी शर्माले ५ हजार ४६१ वटा निकायको लेखा परीक्षण सम्पन्न भएको जानकारी दिए ।

शर्माले सरकारी निकायहरुको बेरुजु १ खर्ब ४ अर्ब रहेको बताए । उनले १ लाख ४ हजार ७२६ वटा दफामा बेरुजु देखिएको जानकारी दिए । समितिले सभापति भरत शाहले लेखापरीक्षणमा देखिएका समस्याहरुलाई हटाउन भूमिका खेल्ने बताए ।