काठमाडौँ– राष्ट्रिय अनुसन्धान विभागको सूचकको रुपमा खोटाङमा कार्यरत ४२ वर्षीय भोला सिंहको आफ्नै भाइले हत्या गरेका छन् ।

३१ वर्षीय भाइ साजन सिंहले शुक्रबार राति धारिलो हतियार प्रहार गरी भोलाको हत्या गरेको जिल्ला प्रहरी कार्यालय मोरङका प्रवक्ता डीएसपी दीपक श्रेष्ठले जानकारी दिए ।

उनका अनुसार मोरङको विराटनगर महानगरपालिका–५ पृथ्वी चोक घर भएका सिंह दाजुभाइबीच घरायसी विवाद हुँदा घटना भएको हो । दाइ केही दिनअघि विदा लिएर घर आएका थिए ।

घाइते भएका भोलाको उपचारको क्रममा विराट अस्पताल विराटनगरमा मृत्यु भएको हो ।

लागूऔषध दुर्व्यसनमा फसेकाले साजनकी पत्नीले गत वैशाखमा औपचारिक रुपमा सम्बन्ध विच्छेद गरेको भए पनि उनलाई परिवारले संरक्षण दिँदै आएको विषयमा दाजुभाइबीच विवाद भएको प्रहरीले जनाएको छ ।

घटनामा संग्लग्न रहेका साजनलाई प्रहरी नियन्त्रणमा लिई थप अनुसन्धान गरिरहेको डीएसपी श्रेष्ठले बताए ।