मुम्बई– कुनै समय बलिउडका गीत र अभिनेताको स्टाइलले बजारको स्टाइल तय गथ्र्यो । ऋषि कपूरको स्वेटर होस् या सुपरहिट गीत सबैलाई दर्शकले उत्तिकै मनपराउथे ।

एउटा यस्तै सुपरहिट गीत थियो फिल्म ‘ये दिल्लगी’को ‘ओले–ओले’ । यो गीत यति सुपरहिट थियो कि तत्कालिन समयमा जुनसुकै पार्टीमा अनिवार्य बज्दथ्यो ।

एबीपी लाइभका अनुसार डीजेमा गीत बज्नासाथ जोकोही फिल्मका अभिनेता सैफ अली खानजस्तै नाँच्न थाल्थे । यो गीत जति हिट छ, त्यति नै यो गीत बन्नु पछाडिको कथा बेग्लै छ ।

यो गीत समीर सेन र दिलीप सेनले लेखेका थिए । गीत यति हिट भयो कि फिल्म निर्माताहरु समीरलाई यस्तै तडक भडक किसिमको गीत माग गर्न थाले ।

फिल्म यशराज ब्यानरमा बनिरहेको थियो । समीर र दिलीपले फिल्मका लागि जम्मा तीन गीत लेखेका थिए । यो गीतलाई उनीहरुले तेस्रो नम्बरमा राखेका थिए ।

जब यश चोपडालाई अन्य दुई गीत सुनाए, उनले दुई गीत अस्वीकार गरे । अन्त्यमा दुवैले यशराजलाई तेस्रो गीत सुनाउदा उनले गीत सुपरहिट साबित हुने घोषणा गरे ।

यो गीत तयार हुनुमा अर्को रोचक किस्सा छ । समीर र दिलीप आफ्नो कारमा कतै जाँदै थिए । त्यहीबेला अचानक बाटोमा पानीसँगै असिना पर्न थाल्यो । त्यसपछि समीरले असिनालाई गीतमा कतै प्रयोग गर्न सकिने सोच बनाए । अनि उनले लेखे ‘ओले ओले’ ।