गोरखा– सप्ताहव्यापी देशदर्शन अभियानमा रहेका प्रदेश २ प्रमुख डा. राजेश अहिराजले पृथ्वीनारायण शाहको जन्मस्थल गोरखा दरबार संग्रहालयमा रहेका ऐतिहासिक सम्पदाको अवलोकन गरेका छन् ।

मनाङ्ग र मुस्ताङ्गको भ्रमण सकेर प्रदेश प्रमुख अहिराज शनिबार गोरखा पुगेका हुन् । गोरखा भ्रमणको क्रममा उनले नेपाल एकीकरणका नायक पृथ्वीनारायण शाहको दरबार भ्रमण गरी शाहको शालिकमा माल्यार्पण गरे । त्यसअघिउनले गोरखकाली भगवती तथा गोरखनाथको पनि पूजाअर्चना गरेका थिए।

प्रदेश प्रमुख अहिराजले माक्र्सवाद, लेनिनवाद, माओवादको मूल आधार पृथ्वीनारायण शाहको दिव्योपदेश भएको चर्चा गरे ।
‘विश्वका ठूल्ठूला नेताहरुले प्रतिपादन गरेका सिद्धान्तभन्दा पनि पृथ्वीनारायण शाहको दिव्योपदेश हाम्रो देशको माटो, हावापानी सुहाउँदो ‘वाद’ भएकाले समुन्नत नेपाल निर्माणका लागि पर्याप्त छ,’उनले भने ।

गोरखाका प्रमुख जिल्ला अधिकारी शालिग्राम पौडेल, प्रहरी प्रमुख एसपी शैलेन्द खनाल, गोरखा दरबारका प्रमुख हरि भुसाल, गोरखा दरबार संग्रहालय प्रमुख नवराज अधिकारी पनि त्यसअवसरमा उपस्थित थिए ।

गोरखाको भ्रमण सकेर उनी नुवाकोट भ्रमणमा गएका छन् ।