काठमाडौं–साहित्यकार घनश्याम पथिकको उपन्यास ‘छुई’ सार्वजनिक भएको छ ।

मण्डला नाटकघरमा मनोज गजुरेल, ऋचा शर्मा र श्रृंखला खतिवडाले उपन्यास विमोचन गरेका हुन् ।

रजस्वलालाई केन्द्र बनाएर लेखिएको उक्त उपन्यासमा रजस्वलाको पीडा र चलनलाई वर्णन गरिएको छ । उपन्यासकार पथिकको ‘छुई’ दोस्रो उपन्यास हो । यसभन्दा अगाडि उनको ‘युनिका’ उपन्यास प्रकाशित भएको थियो ।

मनोज गजुरेलले सहजीकरण गरेको अन्तरसंवादमा श्रृंखला खतिवडा र ऋचा शर्माले आफ्नो धारणा व्यक्त गरेका थिए ।

नेपाली फिल्ममा कथाको खडेरी परिरहेको बेला अभिनेत्री ऋचा शर्माले ‘छुई’ उपन्यासमा फिल्म बनाउन सकिने बताइन् । श्रृंखला खतिवडाले महिलाको कुरा एक पुरुष लेखकले अत्यन्तै मिहिन ढङ्गमा प्रस्तुत गरेको दाबी गरिन् ।

शिखा बुक्सले प्रकाशन गरेको यस उपन्यासको बजार मूल्य ४ सय २५ रुपैंयाँ रहेको छ ।