मुम्बई–बलिउड कलाकारद्वय बोमन इरानी र अरशद वारसी पुनः एकपटक पर्दामा सँगै देखिने भएका छन् । यद्यपि यसपटक उनीहरु कुनै फिल्मका लागि नभई एक टेलिभिजन रियालिटी शोका लागि सहकार्य गर्न लागेका हुन् ।

दैनिक भास्करमा प्रकाशित समाचारअनुसार बोमन र अरशद एक कमेडी रियालिटी शोको प्रमुख हिस्सा हुँदैछन् । जुन शो अमेजन प्राइम भिडियोमा हेर्न सकिनेछ । यतिमात्र होइन, शोको प्रतिष्पर्धी बलिउडकै चर्चित कमेडियन हुनेछन् ।

‘करिब ६ महिनादेखि अमेजन यो रियालिटी शोको योजना बनाइरहेको थियो । तर कोरोनाका कारण यो योजनामा केही ढिलाई भएको थियो । अहिले आएर निर्माताहरु शो होस्ट गर्नलाई अरशद र बोमनलाई अनुबन्धित गरेका छन् ।’ शो निकट स्रोतले भनेको छ ।

सुरुवाती चरणमा निर्माताले शोको तीन सिजन ल्याउनेछन् । शोको सिजन कति संख्यामा बढ्छ भन्ने कुरा पहिलो सिजनलाई प्राप्त प्रतिक्रियामा भर पर्नेछ ।

यो शो अष्ट्रेलियाको कमेडी रियालिटी शो ‘लोल–लास्ट वन लाफिङ’को भारतीय भर्सन हुनेछ । शोमा कमेडियन प्रतिष्पर्धीहरु एकापसमा प्रतिष्पर्धा गर्नेछन् ।

उनीहरुको उद्देश्य अर्को प्रतिष्पर्धीलाई हसाउनु पर्ने भए पनि उनीहरुले हसाउदा आफ्नो अनुहार बिगार्न पाइने छैन । यदी उनीहरुको हाउभाउमा केही परिवर्तन आएमा उनीहरुलाई एविक्ट गरिनेछ ।

निर्माताका अनुसार यो शोमा हालसम्म प्रतिष्पर्धीका रुपमा सुनील ग्रोवर, साइरस ब्रोचा, सुरेश मेनन, गौरव गेरा, मल्लिका दुआ र कुशा कपिला फाइनल भइसकेका छन् ।

शो मे महिनामा सुरु हुनेछ । अरशर र बोमनले फिल्म ‘मुन्ना भाई एमबीबीएस’, ‘लगे रहो मुन्नाभाई’, ‘दन दना दन दोल’ र ‘जोली एलएलबी’मा सहकार्य गरिसकेका छन् ।