काठमाडौँ– नेकपा (माओवादी केन्द्र) ले दल दर्ता खारेजीको माग गर्दै निर्वाचन आयोगमा दर्ता भएको निवेदनलाई हास्यास्पद भनेको छ ।

पार्टी छोडेर एमालेका लागेका पूर्व माओवादी नेताहरूले माओवादी केन्द्र पार्टी अवैधानिक रहेको दाबी गर्दै दल दर्ता खारेजीको मागसहित आयोगमा निवेदन दिएका छन् । माओवादी केन्द्रले आज विज्ञप्ति जारी गर्दै उक्त निवेदन आयोगमा दर्ता भएको प्रति आपत्ति जनाएको हो ।

केन्द्रीय कार्यालय सचिव श्रीराम ढकालले जारी गरेको विज्ञप्तिमा भनिएको छ, ‘पार्टीसँग कुनै पनि सरोकार नराख्ने व्यक्तिले आयोगमा निवेदन दिएको र दल दर्ता र दल खारेजीसम्बन्धी सामान्य कानूनी प्रक्रियासमेत जानकारी नभएको व्यक्तिले यस्तो हरकत गर्नु हास्यास्पद देखिन्छ ।’

केही अवसरवादी, स्वार्थी, लालची, अनैतिक तत्वले यस प्रकारको दुष्प्रचार गरी पार्टीलाई बदनाम गराउन सकिन्छ भन्ने मनशायले उक्त कार्य गर्न गराउन प्रयत्न गरेको माओवादी केन्द्रको दाबी छ ।

संविधान, कानून, विधि, विधानविपरीत दुष्प्रचार गरिएको भन्दै माओवादी केन्द्रले नेता कार्यकर्ता तथा शुभचिन्तकलाई भ्रममा नपर्न आग्रह गरेको छ ।

माओवादी केन्द्रले अनधिकृत तथा आयोगसँग बेसरोकार राख्ने निवदेन स्वीकार नगर्न पनि निर्वाचन अयोगलाई आग्रह गरेको छ।

‘हाम्रो पार्टी त्यस्तो कुनियतको दुष्प्रचारलाई खारेज गर्दछ,’ विज्ञप्तिमा भनिएको छ, ‘त्यस प्रकारका अनधिकृत तथा आयोगसँग बेसरोकार निवेदन दर्ता स्वीकृत गर्दा अनावश्यक भ्रम सिर्जना हुने भएकोले आइन्दा त्यसो नगरियोस् भन्ने आग्रह समेत गर्दछौं ।’