काठमाडौँ– नेकपा एमालेको माधव–झलनाथ समूहका सांसदहरूको सामूहिक राजीनामा आजको लागि रोकिएको छ । प्रधानमन्त्री तथा पार्टी अध्यक्ष केपी शर्मा ओलीले पठाएका विष्णु पौडेल र सुवास नेम्वाङसँग भेटेपछि राजीनामा रोकिएको हो ।

ओलीले आफ्नो कदम नसच्चाए माधव–झलनाथ समूहले आज सामूहिक राजीनामा गर्ने निर्णय गरेको थियो । तर, संसद् सचिवालयमा माधव–झलनाथ समूहको सांसद् उपस्थित हुन थालेपछि ओलीले आफू पक्षका दुई नेतालाई पठाएका थिए ।

दुवै पक्षले आ-आफ्नो कुरा राखेको भए पनि कुरा मिल्न सकेको छैन । नेता नेपाललाई भेटेर फर्केपछि नेता पौडेलले राजीनामाबारे विचार गर्ने आश्वासन दिएको बताए ।

​उनले सञ्चारकर्मीहरूसँग भने, ‘उहाँले राजीनामाबारे विचार गर्छु भन्नुभएको छ । उहाँहरु विनाशको बाटोमा जानुहुन्छ भन्ने मलाई लागेको छैन ।’

यस्तै बैठकपछि नेम्वाङले पनि माधव–झलनाथ समूहको राजीनामाको कुरा चर्चा मात्रै भएको प्रतिक्रिया दिए ।