बुटवल – राष्ट्रिय जनमोर्चाका अध्यक्ष चित्रबहादुर केसीले देशलाई मध्यावधि निर्वाचन तर्फ धकेल्ने षड्यन्त्रमा प्रधानमन्त्री केपी शर्मा ओली लागेको आरोप लगाएका छन् ।

विघटित प्रतिनिधि सभा पुनःस्थापना भएपछि नैतिकताको आधारमा प्रधानमन्त्री ओलीले राजीनामा दिनुको सट्टा फेरि देशलाई मध्यावधि निर्वाचन तर्फ धकेल्ने षड्यन्त्रमा लागेको आरोप लगाएका हुन् ।

बुटवलमा भएको राष्ट्रिय जनमोर्चाको चौथो राष्ट्रिय सम्मेलनले गरेका निर्णयहरू सार्वजनिक गर्न शुक्रबार आयोजित पत्रकार सम्मेलनमा बोल्दै केसीले टुट् फुट् भएका कम्युनिस्टहरू फेरि मिलेर सरकार बनाउनुपर्ने र त्यसको लागि पहिले ओलीले राजीनामा दिनुपर्ने बताए ।

केसीले सरकार जनताको आधारभूत समस्याहरू समाधान गर्नुको साटो संसद किनबेचको खेलमा लागेको बताए । केसीले संघीयताले मुलुकलाई बोझ थपेको भन्दै संघीयता खारेजीको माग गरे ।

चौथो राष्ट्रिय सम्मेलनले पुन: केसीको अध्यक्षतामा ४७ सदस्यीय केन्द्रीय समिति चयन गरेको छ । जसको कार्यकारी अध्यक्षमा रश्मीराज नेपाली, उपाध्यक्षमा जनकराज शर्मा, दुर्गा पौडेल, महासचिवमा मनोज भट्ट, सचिवमा हिमलाल पुरी र कोषाध्यक्षमा मधु क्षेत्री निर्वाचित भएका छन् ।