काठमाडौं–भारतीय अभिनेत्री सनी लियोनीलाई फिल्म ‘पासवर्ड’मा अभिनय गराएर चर्चामा आएका निर्देशक सम्राट बस्नेतले नयाँ फिल्म ‘लाल मोहनजी’ निर्देशन गर्ने भएका छन् ।

फिल्म ‘पासवर्ड’ रिलिजको दुई वर्षपछि द्वन्द्व निर्देशकसमेत रहेका सम्राटले ‘लाल मोहनजी’ निर्देशन गर्न लागेका हुन् ।

आररोसफी फिल्मस्को ब्यानरमा निर्माण हुने फिल्ममा विपिन कार्की, अर्पण थापा, कर्मा शाक्य, रोहित रुम्बा, रवीन्द्र झा, सुष्मा कार्की, सुभाष मेचे, कालु राना, सुगन तण्डुकार र बालकलाकार सुशान्त मेचे अनुबन्धित भएका छन् ।

फिल्मका प्रस्तुतकर्ता तथा निर्माता सुगन तण्डुकार हुन् । निर्देशक बस्नेतका अनुसार फिल्मका लागि अभिनेत्रीको खोजी भइरहेको छ ।

फिल्ममा प्रवेश पौडेलको कथा, आकाश बरालको पटकथा र संवाद, सन्तोष राजको संगीत, निरज कँडेलको छायांकन, राजु तामाङको द्वन्द्व, कविराज गहतराजको नृत्य र अर्जुन जिसीको सम्पादन छ ।

नेपाल, भारत, क्यानाडा र अष्ट्रेलियामा छायांकन हुने फिल्मको छायांकन जेठको पहिलो साताबाट फ्लोरमा जानेछ ।

आगामी तिहारमा रिलिज हुने फिल्मका प्रोडक्सन म्यानेजर दीपिल पन्त हुन् ।