काठमाडौं– गायिका अनिला राईको स्वर रहेको गीत ‘टलटल टल्किने’ करोड क्लबमा प्रवेश गरेको छ । यो गीतमा अनिलालाई गायक राजेशपायल राईले स्वरमा साथ दिएका छन् ।

यो गीत फिल्म ‘वीरविक्रम’मा समावेश छ । नयाँ एलबमको तयारी गरिरहेकै बेला आफूले गाएको गीतले करोड बढी दर्शक पाएपछि अनिला दंग छिन् ।

‘एल्बमको तयारी गरिरहेकै बेला ‘टलटल टल्किने’ गीतले करोडभन्दा बढी भ्युअर्स पाएको छ । दर्शक तथा श्रोताको यो मायाले खुसी लागेको छ,’उनले भनिन् ।

करिब डेढ दशकदेखि बेलायतमा बस्दै आएकी गायिका अनिलाले त्यहाँ बसेर पनि नेपाली गीतसंगीतलाई निरन्तर अँगाल्दै आएकी छन् ।

लोकदेखि आधुनिक र फिल्म गीतसम्म गाउँदै आएकी अनिलाका गीतहरु दर्शक तथा श्रोताले पनि रुचाएका छन् । यसैक्रममा ‘टलटल टल्किने’ गीत करोड क्लवमा प्रवेश गरेको हो ।

पछिल्लो समय ‘स्वरांकन’ नामक एल्बम निकालेकी अनिलाले केही महिनापछि नयाँ एल्बम ल्याउन लागेको बताइन् । अनिलाका ‘बादलसँगै’, ‘ए साँइला’, ‘मेरो नजर’, ‘तिमी बाहेक’, ‘आँखाभरी’जस्ता दर्जनौँ गीत चर्चित छन् ।