काठमाडौं–अढाई दशकदेखि गीत लेखनमा सक्रिय गीतकार प्रतिमा श्रेष्ठको दुई कृति गीतिसंग्रह ‘प्रेम प्रार्थना’ र गीति पुस्तक ‘अक्षत अनुराग’ सार्वजनिक भएको छ । अन्तर्राष्ट्रिय नारी दिवसको अवसर पारेर उनले आफ्ना कृति सार्वजनिक गरेकी हुन् ।

दुवै कृतिको गायक दीप श्रेष्ठ, गीतकार दिनेश अधिकारी, डा. कृष्णहरि बराल र विप्लव प्रतिकले विमोचन गरे ।

गीतिसंग्रह ‘प्रेम प्रार्थना’मा पाँच गीत छन् । जसमा ‘मेरो हजुर’, ‘प्रेम प्रार्थना’, ‘मिल्छ भने एउटा’, ‘सुनन’ र ‘किस्ता किस्ता’बोलका गीत छन् । गीतमा अनिल शाहीको संगीत छ ।

गीतमा स्वरुपराज आचार्य, इतु जोजिजु, बबिता मानन्धर, अस्मिता परियारको स्वर छ । गीतिसंग्रहलाई मिडिया ल्याण्डले बजारमा ल्याएको हो ।

कार्यक्रममा एल्बमको तीना गीतको भिडियो पनि सार्वजनिक गरियो । जसमा ‘प्रेम प्रार्थना’मा धिरेन शाक्य र उषा खड्गी, ‘किस्ता किस्ता’मा संगीतकार अनिल र गायिका अस्मिता र ‘सुनन’मा दिवश श्रेष्ठ र सब्बु शाही फिचर्ड छन् ।

गीति पुस्तक ‘अक्षत अनुराग’मा प्रतिमाले लेखेका ७२ गीत संग्रहित छन् ।