काठमाडौं–कवि तथा लेखक सुरेन्द्र अस्तफलको कवितासंग्रह ‘तेल भिसा’ को लोर्कापण गरिएको छ । चितवनमा बसेर साहित्य सिर्जना गरिरहेका अस्तफलको कृति नेपाल प्रज्ञा प्रतिष्ठानस्थित लेखनाथ प्रवचन कक्षमा कवि श्रवण मुकारुङ, कवि तथा समालोचक महेश पौडेललगायतले लोकार्पण गरे ।

आफ्ना कवितामा समाजको चित्रण गर्न मन पराउने अस्तफलका यस अगाडि ‘शब्दहरू अविराम यात्रामा’, ‘आमा’, ‘विम्वशिविर’ र ‘हिउँको आरोहण’ कृति प्रकाशित भइसकेका छन् ।

शिक्षण पेशामा संलग्न अस्तफल चितवन साहित्य परिषद्, नेपाली लेखक संघ र आमा सुमित्रादेवी साहित्य प्रतिष्ठान चितवनका संस्थापक अध्यक्षसमेत रहेका हुन् ।

कवितासंग्रहमा युगबोध, जीवनबोध एवं जीवन भोगाइका कटु यथार्थको प्रकटीकरणका साथै अस्तित्वबोध, विसंगतिबोध र प्रणयचेतको अभिव्यक्ति पाइन्छ ।

साहित्यकार प्रभा बरालले सञ्चालन गरेको कार्यक्रममा शुभकामना मन्त्व्य शिखा बुक्सका प्रमुख पुष्पराज पौडेलले दिएका थिए । कार्यक्रममा प्रमुख अतिथि कवि श्रवण मुकारुङ रहेका थिए । कवि तथा समालोचक महेश पौड्याल र समालोचक ज्ञानु अधिकारीले कवितासंग्रहमाथि समीक्षात्मक टिप्पणी गरेका थिए ।

शिखा बुक्सले बजारमा ल्याएको यस पुस्तकको मूल्य दुई सय रुपैंयाँ रहेको छ ।