मुम्बई(दैनिक जागरण)–दिल्ली उच्च अदालतले अभिनेत्री जूही चावलालाई २० लाख रुपैंयाँ जरिवाना तिर्नका लागि एक हप्ताको अल्टिमेटम दिएको छ । जूहीमाथि फाइभ जी वायरलेस नेटवर्क टेक्नोलोजीकाविरुद्ध उजुरी दर्ता गराउन कानूनको गलत प्रयोग गरेको भन्दै अदालतले जरिवाना तोकेको थियो ।

न्यायधिश जेआर मिधाले अदालत जूहीको व्यवहार देखेर चकित भएको र गरिमापूर्वक जरिवाना भर्नका लागि पनि उजुरीकर्ता तयार नभएको बताएका छन् ।

अदालतले अभिनेत्रीले अदालतको पैसा फिर्ता गर्ने सम्बन्धी तीन उजुरीमा सुनुवाई गरिरहँदा जूहीको वकिलले माफीको उजुरी फिर्ता लिएर एक हप्ता या दश दिनसम्ममा पैसा जम्मा गरिदिने जनाएका थिए ।

गत जूनमा उच्च अदालतले फाइभजी वायरलेस नेटवर्क सेटअपविरुद्ध परेको जूहीको उजुरीलाई खारेज गरिदिएको थियो र २० लाख रुपैयाँ जरिवाना तिर्न भनेको थियो ।
अदालतले उजुरीलाई दोषपूर्ण, कानूनको दुरुपयोग र प्रचारप्रसारको प्रयास भनेको थियो ।