काठमाडौँ – राष्ट्रपति विद्यादेवी भण्डारीको एउटा ट्वीटलाई ट्वीटरले बिना कारण सेन्सर लगाएको छ ।
राष्ट्रपति भण्डारीले गएको मार्च २४ का दिन गरेको ट्वीटमाथि ट्वीटरले सेन्सर लगाएको हो । राष्ट्रपतिको भेरिफाइड ट्वीटर ह्याण्डलबाट गरिएको यो ट्वीटमा राष्ट्रपति भण्डारीले आफ्नो बंगलादेश भ्रमणको बारेमा जानकारी साझा गरेकी थिइन् ।
ट्वीटमा लेखिएको छ ‘बंगलादेशका महामहिम राष्ट्रपति मोहम्मद अब्दुल हमिदको मैत्रीपूर्ण निमन्त्रणामा भएको राजकीय भ्रमण सम्पन्न भएको छ । न्यानो र आत्मीय आतिथ्यका लागि महामहिम राष्ट्रपति, महामहिम प्रधानमन्त्री शेख हसिना, बंगलादेशी सरकार र जनतालाई हार्दिक धन्यवाद ! यस भ्रमणबाट हाम्रा दुई मुलुक र जनताबीचको घनिष्ट सम्बन्ध अझ प्रगाढ भएको छ ।’ यो ट्वीटमा त्यस्तो असामान्य र संवेदनशील कुरा केही पनि देखिँदैन ।
ट्वीटमा लेखिएको कुराको स्क्रिनशट लिएर फोटोको रुपमा पोस्ट गरिएको छ । यो ट्वीटलाई ट्वीटरले संवेदनशील सामग्री भएको भन्दै लुकाएको छ । यो ट्वीट यत्तिकै देखिँदैन र हेर्न चाहनेले हेर्ने सेटिङ अन गरेपछि मात्रै हेर्न मिल्छ ।
सामान्यतया विवादित, पुष्टि नभएका कुरा, जातीय, धार्मिक रुपमा सहिष्णुतामा खलल पुग्ने कुरा वा घाउचोट लागेका वा यस्तै संवेदनशील तस्वीरलाई यसरी लुकाइन्छ । यसअघि अमेरिकी राष्ट्रपति डोनाल्ड ट्रम्पले गरेका केही विवादित ट्वीट ट्वीटरले यसरी लुकाएको थियो ।
— Bidya Devi Bhandari (@PresidentofNP) March 24, 2021
प्रतिक्रिया