मुम्बई– बलिउड सुपरस्टार देव आनन्दले सय बढी फिल्ममा अभिनय र १९ फिल्मको निर्देशन गरेका छन् । उनले निर्देशन गरेकाे दाेस्राे फिल्म ‘हरे रामा हरे कृष्णा’ हो ।

एबीपी लाइभमा प्रकाशित समाचारअनुसार सन् १९७१ मा भएको यो फिल्म बक्सअफिसमा सुपरहिट भएको थियो । यो फिल्म बन्नुपछाडि एउटा रोचक कथा छ ।

तत्कालीन समयमा देव आनन्द केही कामका लागि नेपालको काठमाडौं गएका थिए । उनका जर्मन साथीले आफू पनि एक वृत्तचित्रको सुटिङका लागि काठमाडौं आएको जानकारी दिए ।

काठमाडौंमा भेटेपछि ती जर्मन साथीले देव आनन्दलाई नेपालको त्यो स्थानको बारे बताइदिए, जुन स्थानमा विदेशीहरु आएर पार्टी र गाजा, चरेस सेवन गर्थे ।

देव आनन्द त्यहाँको माहौल हेर्न जाँदा युवायुवतीहरु गाजा, चरेस सेवनमा रमाएको देखे । त्यही भीडमा उनको नजर एक युवतीमा पर्यो, जो झट्ट हेर्दा विदेशी जस्तो देखिन्न थिइन ।

पार्टी भएको स्थानको वेटरसँग देव आनन्दले ती युवतीको बारेमा सोधे । वेटरले भोलिपल्ट ती युवतीसँग गफगाफका लागि समय मिलाइदिए ।

ती युवतीको नाम जस्वीर थियो, जो आफूलाई जेनिस भन्न चाहन्थिइन् । क्यानाडा घर भएकी उनी भागेर नेपाल आएकी थिइन् । किनकी उनकी आमाले उनलाई घरमा धेरै कुरामा प्रतिबन्ध लगाएकी थिइन् ।

जेनिसको कथा सुनिरहँदा देव आनन्दलाई आफ्नो नयाँ फिल्मको कथाको अवधारणा दिमागमा आयो । त्यसपछि उनले जेनिसको जीवनमा आधारित रहेर एक हिप्पी संस्कृतिबारेमा फिल्म बनाउने निर्णय लिए ।

फिल्ममा जेनिसको भूमिकाका लागि देव आनन्दले जीनत अमानलाई लिए । यो फिल्म यति हिट भयो कि जीनत रातारात स्टार बनिन् । यो फिल्म पछि देव आनन्द र जीनतले ‘इश्क इश्क इश्क’, ‘प्रेम शास्त्र’लगायतका कैयौं फिल्ममा अभिनय गरे ।