काठमाडौँ– प्रधानमन्त्री केपी शर्मा ओलीले नेपाललाई उत्पादक र निर्यातकर्ता देश बनाउने अभियानतर्फ लैजानु पर्नेमा जोड दिएका छन् ।

सोमबार काठमाडौंमा नेपाल उद्योग परिसंघको आयोजनामा भएको ‘मेक इन नेपाल’ अभियानको सुरुवात गर्दै प्रधानमन्त्री ओलीले यस्तो बताएका हुन् ।

यो अभियानलाई उत्पादन बिक्री गर्ने विज्ञापनको रुपमा नभई राष्ट्रिय अर्थतन्त्रलाई आत्मनिर्भर बनाउने र आवश्यकीय उत्पादनमा आत्मनिर्भर बनाउँदै नेपाललाई आयातक र उपभोक्ता देशबाट उत्पादक र निर्यातकर्दा देश बनाउने दिशामा अघि बढ्नुपर्ने प्रधानमन्त्री ओलीको जोड थियो ।

उनले भने, ‘अब नेपाललाई आयातक र उपभोक्ता देशबाट उत्पादक र निर्यातक देश बनाउनुपर्छ ।’

प्रधानमन्त्री ओलीले नेपालमा खाद्य वस्तुको कमी नभएको र प्रत्येक वर्ष ११ दशमलब दुई प्रतिशत कृषि उपज उत्पादन वृद्धि हुँदै गएको बताए ।

‘नेपालमा उत्पादन भइरहेको खाद्य वस्तुले भोकमरी पर्ने अवस्था छैन ।’ उनले भने, ‘तर पनि लामो सिता भएको चामलको शौखले वार्षिक रुपमा करिब ४० अर्बको चामल आयात भइरहेको छ ।’

मेक इन नेपालको स्वदेशी अभियान निजी क्षेत्रका व्यवसायीले शुरू गरे पनि यो सरकारका लागि आवश्यक रहेको उनले बताए ।

सरकार यो अभियानको साथमा रहेकाले आवश्यक सहयोग गर्ने प्रधानमन्त्री ओलीले प्रतिबद्धता जनाए ।