मुम्बई(एजेन्सी)– कोरोना संक्रमणबाट अझै पनि फिल्मकर्मीहरु अछुतो हुन सकेका छैनन् ।

बलिउडका अमिताभ बच्चन, अभिषेक बच्चनदेखि वरुण धवन र मलाइका अरोडासहित कैयौं सेलिब्रेटीहरु कोरोनाको चेपटामा परिसकेका छन् ।

अब यही सूचीमा दक्षिण भारतीय फिल्मका अभिनेता सूर्या पनि अँटेका छन् । यी अभिनेतालाई कोरोना संक्रमण देखिएपछि हाल उनको उपचार भइरहेको छ । यद्यपि उनले आफ्ना फ्यानलाई नआत्तिन र नडराउन आग्रह गरेका छन् ।

‘मलाई कोरोना संक्रमण भएको छ र मेरो उपचार भइरहेको छ । अहिले म ठिक छु । जीवन अहिले पनि सामान्य भइसकेको छैन । हामीले अझै पनि सुरक्षा र सावधानी अपनाउन बाँकी नै छ । यस्तो अवस्थामा मलाई साथ र सहयोग गर्नुहुने डाक्टर तथा मेडिकल स्टाफलाई विशेष धन्यवाद’, उनले ट्वीट गरेका छन् ।

सूर्याका मिल्ने साथी तथा निर्माता राजशेखर पण्डियनले पनि सूर्याको विषयमा चिन्ता नलिन फ्यानलाई आग्रह गरेका छन् । सूर्यालाई कोरोना संक्रमण भएको खबर सार्वजनिक हुनासाथ उनका फ्यानहरुले चिन्ता व्यक्त गर्न थालेका छन् । उनीहरुले आफ्नो मनपर्ने अभिनेताको सिघ्र स्वास्थ्य लाभको कामना गरको छन् ।

हालै मात्र सूर्याको फिल्म ‘सोरारई पोटरु’ रिलिज भएको छ । फिल्मलाई दर्शकले निकै मनपराएका छन् ।