खोटाङ- खोटाङमा नेकपा एमालेबाट निर्वाचित ११ जनप्रतिनिधिले नेकपा एकीकृत समाजवादी पार्टीमा सनाखत गरेका छन् । एमालेका जिल्ला समन्वय समिति प्रमुख, जिल्ला समन्वय समितिका दुई सदस्य, एक वडाध्यक्ष र सात वडासदस्यले एकीकृत समाजवादीमा सनाखत गरेका हुन् ।

नेकपा एमालेबाट छुट्टिएर माधवकुमार नेपालले नेकपा एकीकृत समाजवादी दल दर्ता गरेसँगै निर्वाचन आयोगले नयाँ दल रोज्नका लागि मंगलबारसम्मको समय सीमा दिएको थियो ।

२०७४ सालमा सम्पन्न स्थानीय तहको निर्वाचनमा एमालेबाट निर्वाचित जिल्ला समन्वय समितिका प्रमुख बबी चाम्लिङ, जिल्ला समन्वय समितिका सदस्य उदयबहादुर कार्की र रञ्जना राई, बराहपोखरी गाउँपालिका-४ फाक्टाङका वडाध्यक्ष भुवलराज राईले एकीकृत समाजवादीमा सनाखत गरेका छन् । यस्तै बराहपोखरी गाउँपालिका-५ पौवासेराका वडा सदस्य हरिबहादुर मगर, दिक्तेल रुपाकोट मझुवागढी नगरपालिका-५ लफ्याङका वडा सदस्य अनुप चाम्लिङ राई, जन्तेढुंगा गाउँपालिका-६ दिप्लुङका वडा सदस्य प्रकाश राई र महिला सदस्य रञ्जना राईले एकीकृत समाजवादीमा सनाखत गरेका छन् ।

दिक्तेल रुपाकोट मझुवागढी नगरपालिका–८ दोर्पाचिउरीडाँडाका वडा सदस्य हरिबहादुर राई, केपिलासगढी गाउँपालिका-३ बासपानीका शिवकुमार राई र केपिलासगढी गाउँपालिका–५ सप्तेश्वरका वडा सदस्य रामकुमार बस्नेतले जिल्ला निर्वाचन कार्यालयमा पुगेर नयाँ दल रोजेका छन् ।

गएको स्थानीय तहको निर्वाचनमा नेकपा एमालेबाट निर्वाचित ३६ वडाध्यक्षमध्ये एक जनाले मात्र एकीकृत समाजवादी रोजेका छन् । स्थानीय तहको निर्वाचनमा एमालेले जिल्लाका १० स्थानीय तहमध्ये पाँच स्थानीय तहमा प्रमुख र उपप्रमुख तथा दुई स्थानीय तहमा उपप्रमुख जितेको थियो । प्रतिनिधिसभा सदस्य बिशाल भट्टराई र प्रदेशसभा सांसद उषाकला राई एमालेमै रहेका छन् ।

उता प्रदेशसभा सदस्य राजन राईले मात्र एकीकृत समाजवादी रोजेका छन् । चाम्लिङ एमालेको जिल्ला अध्यक्ष छाडेर एकीकृत समाजवादीको नेतृत्व सम्हाल्न पुगेका हुन् ।