ललितपुर– नेकपा एमालेका वरिष्ठ नेता माधवकुमार नेपालले बहुदलीय लोकतान्त्रिक पद्धतिलाई बलियो बनाउनका लागि संविधानको सफल कार्यान्वयन गर्नुपर्ने बताएका छन् ।

शनिबार ललितपुर महनगरपालिका – २ नम्बर वडा कार्यालयको नवनिर्मित भवनको उद्घाटन गर्दै नेता नेपालले राज्यको विभिन्न निकायको बीचमा अधिकार र कर्तव्यको सन्तुलन कायम गरेर संघीय व्यवस्थालाई बलियो बनाउनुपर्ने र संविधानको सफल कार्यान्वयन गर्नुपर्ने धारणा राखे ।

गणतन्त्र र संघीयतालाई संस्थागत गर्न र कानूनी शासनको प्रत्याभूति गर्नका लाग संविधान निर्माण भएको भन्दै संविधानको रक्षा गर्नु सबैको कर्तव्य भएको उनले बताए । देशमा जनता सुखी र मलुक समृद्धी होस् भन्ने सबैको चाहना रहेको उनको भनाइ छ ।

नेता नेपालले संघीय, प्रदेशीक र स्थानीय तहको संरचनाले सिंहदरबारमा केन्द्रित सेवा सुविधा नागरिकको घर घरमा पुराएकाले सबै जनताले यसको महशुस गर्ने गरी सबै तहले काम गर्नुपर्ने जिकिर गरे ।

त्यस्तै ललितपुर महानगरका प्रमुख चिरीबाबु महर्जनले ललितपुर महानगर सार्वजनिक, प्रति र ऐलानी जग्गामा कुनै संरचना बनाउन नदिने नीति नै पारित गरेको बताए । उनले शंखमुलमा विद्युतीय शवदाह निर्माण गर्ने काम शुरु गरिसकेको जानकारी दिए ।

कार्यक्रममा वडा कार्यालयको भवन निर्माण गर्नका लागि सहयोग गर्नेहरुलाई सम्मान गरिएको थियो ।