दोहा– मलेसियाको अध्यागमन विभागले गैरकानूनी रुपमा बसेका नेपालीसहित २ सय ५ आप्रवासी श्रमिकलाई पक्राउ गरेको छ ।

अध्यागमनले त्यहाँको पुडु अपार्टमेन्टमा छापा मारेर उनीहरु पक्राउ गरेको हो ।

पक्राउ पर्नेहरुमा नेपाल,बंगलादेश र इन्डोनेसियाका रहेका छन् । पक्राउ परेकाहरुसंग वैध कागजात, पास वा अनुमतिपत्र केही नभएको विभागलाई उदृत गर्दै मलेसियाबाट प्रकाशन हुने द स्टार पत्रिकाले जनाएको छ ।

पक्राउ गरिएका केही व्यक्तिहरू २०१६ देखि गैरकानूनी तरिकाले त्यहाँ रहेको बताइएको छ । पक्राउ गरिएकाहरु २० देखि ४० वर्ष उमेर समूहबीचका रहेका विभागले जनाएको छ ।

क्वालालम्पुर अध्यागमन निर्देशक हमीदी आदमका अनुसार जनताबाट गुनासो आएपछि विभागले उक्त अपार्टमेन्टमा छापा मारेर उनीहरुलाई पक्राउ गर्न सफल भएको हो ।

उनीहरुलाई थप अनुसन्धानका लागि क्वालालम्पुर अध्यागमन मुख्यालयमा पठाइएको निर्देशक हमीदीले बताए । पक्राउ परेकाहरुको परिचय खुलाइएको छैन ।

मलेसियाले गैरकानूनी रुपमा बसेका नेपालीसहित आप्रवासी कामदारलाई गत डिसेम्बरदेखि नै स्वदेश फर्किने मौका प्रदान गरेको छ ।

मलेसिया सरकारले त्यहाँ गैरकानूनी रुपमा रहेका कामदारहरुको व्यवस्थापनको लागि रिक्यालीब्रेसन कार्यक्रम घोषणा गरेर स्वदेश फर्काईरहेको छ ।