काठमाडौँ– इस्लामी संघ नेपालले आफूहरु कुनै पनि गैर कानूनी र आतंकवादी गतिविधिमा संग्लग्न नरहेको जनाएको छ ।
आज एक विज्ञप्ति जारी गर्दै संघले केही मिडियामा संस्थाको नाम जोडेर आएका समाचारहरुप्रति आपत्ति जनाउँदै आफ्नो संस्था नितान्त सामाजिक काममा सक्रिय रहेको जनाएको हो ।

उसले आफूविरुद्ध केही मिडियाहरुमा प्रकाशित समाचार भ्रमपूर्ण रहेको दाबी गरेको हो । केही भारतीय मिडियाले यस संगठनलाई बदनाम गर्ने प्रयास गरिराखेको भन्दै उक्त समाचारहरु भ्रमपूर्ण रहेको संघले दाबी गरेको हो ।

संघले विज्ञप्ति जारी गर्दै आइएचएचसँग सम्बन्धको हवाला दिंदै आतंकवादसित जोडिएको भनेर आफूहरुविरुद्ध निराधार र कपोलकल्पित आरोपहरु लगाइएको प्रति ध्यानाकर्षण भएको जनाएको हो ।

भारतीय केही मिडियाहरुमा आएको समाचारलाई उद्धृत गर्दै नेपाली केही मिडियाहरुले पनि बिना कुनै छानविन र प्रमाणका आधारमा यस्तै आशयको रिपोर्ट प्रकाशित गरेको प्रति संघले खेद प्रकट गरेको छ ।

‘यो एउटा दुष्प्रचार, अत्यन्त गैर जिम्मेवारीपूर्ण, अति निन्दनीय र घोर आपत्तिजनक कार्य हो । एउटा प्रतिष्ठित संस्थामाथि छानविन नै नगरी दुष्प्रचारको भरमा आरोप लगाउनु किमार्थ न्यायोचित होइन’, संघका अध्यक्ष खुर्सिद आलम द्वारा जारी विज्ञप्तिमा भनिएको छ, ‘यो आचार संहिता विपरीत र पीत पत्रकारिता हो । हामी यसको भत्सर्ना र कडा प्रतिवाद गर्दछौँ ।’

संघले त्यस्ता समाचार पोर्टलहरूले क्षमा याचना माग्दै उक्त रिपोर्टको तत्काल खण्डन प्रकाशित गर्न समेत माग गरेको छ । अन्यथा उनीहरूविरुद्ध कानुनी कारबाही गर्न बाध्य हुने समेत स‌ंघले जनाएको छ ।

संघले समाज कल्याण परिषदबाट स्वकृति लिई देशी विदेशी संघ–संस्थाहरुको सहयोग र सहकार्यमा पारदर्शी ढंगले आफ्ना कार्यक्रमहरु संचालन गर्दै आइरहेको जनाएको छ । उसले शंकास्पद अथवा प्रतिबन्धित संस्थाहरुसंग कदापि सहकार्य नगरेको समेत दाबी गरेको छ ।

इस्लामी संघ नेपाल विश्वव्यापी संगठन आइएचएचसँग सहकार्य गरिरहेको छ जसको मुख्यालय टर्कीमा रहेको उसले जनाएको छ । संगठनले विगत २० वर्ष देखि १२३ वटा देशहरुमा मानवीय सेवा कार्य गर्दै आइरहेको जनाएको छ ।

यस्तो छ संघद्वारा जारी विज्ञप्ति