काठमाडौँ– काठमाडौँ उपत्यकाभित्र चल्ने सार्वजनिक तथा निजी सवारी साधनमा मंगलबारदेखि जोर–बिजोर प्रणाली हटाइएसँगै सडकमा सवारीको चाप बढेको छ ।

माइक्रो, टेम्पोलगायत सवारी पनि आजदेखि चलेका छन् । जसका कारण उपत्यकाका सडकमा सवारीसाधनको चाप बढेको छ । कोरोना संक्रमण जोखिमका कारण जारी गरिएको निषेधाज्ञा खुकुलो बनाइएसँगै दुई महिनापछि सबै सवारीसाधन सञ्चालनमा आएका हुन् ।

सार्वजनिक यातायातमा सिट क्षमताभन्दा बढी यात्रु राख्न पाइने छैन भने मास्कलगायत स्वास्थ्यका मापदण्ड अनिवार्य रूपमा पालना गर्नुपर्ने जिल्ला प्रशासन कार्यालय काठमाडौँले जनाएको छ । यसअघि २५ सिट क्षमताभन्दा बढीका सवारी साधन मात्रै चलाउन दिइएको थियो । त्यस्तै परीक्षा हलमा २५ जना मात्रै विद्यार्थी राख्ने गरी परिक्षा सञ्चालन गर्न अनुमति दिइएको छ ।

काठमाडौँ उपत्यकाका तीनै जिल्लामा असार ३१ गतेसम्मलाई निषेधाज्ञा थप गरिएको छ ।