मुम्बई(दैनिक जागरण)– बलिउडका निर्माता तथा निर्देशक करण जोहारले सोमबार आफू निर्देशनमा फर्कन लागेको घोषणा गरेका छन् । करणले एक भिडियोमार्फत पाँच वर्षको वनवासलाई पुरा गर्दै निर्देशनमा फर्किन लागेको उल्लेख गरेका छन् ।

फिल्मको घोषणा उनले मंगलबार गर्दैछन् । प्रेमकथाको यो फिल्ममा धर्मेन्द्र, शबाना आजमी र जया बच्चनसँगै रणवीर सिंह र आलिया भट्टको प्रमुख भूमिकामा अभिनय रहनेछ ।

अभिनेता धर्मेन्द्रले करणको फिल्ममा काम गर्ने कुराको पुष्टि गरेका छन् । उनले आफू करणसँग काम गर्न उत्साहित भएको उल्लेख गरेका छन् । फिल्ममा धर्मेन्द्र र शबाना पहिलोपटक सँगै काम गर्दैछन् ।

यो मल्टीस्टारर फिल्मको नाम ‘रकी र रानीको प्रेमकथा’ छ । जसमा रणवीर रकी र आलिया रानी हुनेछिन् । धर्मेन्द्र र शबाना आलियाको हजुरबुवा र हजुरआमाको भूमिकामा हुनेछन् भने जया रणवीरकी हजुरआमा बन्नेछिन् ।

रणवीर र आलियाले यसअघि फिल्म ‘गली ब्वाइ’मा काम गरिसकेका छन् । करणले निर्देशन गरेको पछिल्लो फिल्म सन् २०१६ को ‘ऐ दिल है मुस्किल’ हो । जसमा रणवीर कपूर, ऐश्वर्या राय बच्चन र अनुष्का शर्मा प्रमुख भूमिकामा थिए ।