झापा– दमकस्थित सरकारी अस्पताल दमक अस्पतालअन्तगर्त रहने गरी अक्सिजन प्लान्ट निर्माण प्रक्रिया शुरू भएको छ ।

युनाईटेड नेशन्स् अफिस फर प्रोजेक्ज सर्भिस–युएनओपीएस मार्फत अक्सिजन प्लान्ट निर्माण प्रक्रिया शुरू भएको हो । दमक नगरपालिका मातहतको दमक अस्पतालले सञ्चालन गरिरहेको कोभिड अस्पताललाई लक्षित गरेर यो योजना शुरू भएको हो ।

अस्पताल सञ्चालक समिति अध्यक्ष समेत रहेकी नगरपालिकाकी उपप्रमुख गीता अधिकारीका अनुसार युएनओपीएस मार्फत सात प्रदेशमा एक–एक वटा अक्सिजन प्लान्ट निर्माण हुने योजना अनुसार दमकमा पनि प्रक्रिया शुरू भएको हो । उनका अनुसार ४० घन मिटर प्रतिघण्टा अक्सिजन उत्पादन हुने प्लान्ट निर्माण गरिने छ । प्लाण्ट स्थापना गरी जति सक्दो चाँडो अक्सिजन उत्पादन शुरू गर्ने लक्ष्य राखिएको छ ।

स्वास्थ्य तथा जनसंख्या मन्त्रालय, स्वास्थ्य सेवा विभाग, व्यवस्थापन महाशाखाले अक्सिजन प्लान्टका लागि आवश्यक पर्ने जमिन पहिचान गरी उपलब्ध गराउन दमक अस्पताललाई आग्रह गरेको थियो । सोही अनुसार नगरपालिकाले व्यवस्थापन गरेको जमिनमा प्राविधिक सहितको टोलीले निरीक्षण गरेको छ ।

महाशाखाका महानिर्देशक डा. दिपेन्द्ररमण सिंहले दमक अस्पताललाई पठाएको पत्र अनुसार ४० घन मिटर प्रतिघण्टा उत्पादन क्षमताको प्लान्ट सञ्चालनका लागि विश्व बैंकको सहयोग प्राप्त भएको छ । ३ वर्षसम्म प्लान्ट सञ्चालन गर्न विश्व बैंक तथा युनएनओपीएसले सहयोग गर्ने जनाईएको छ ।