काठमाडौं– सन् २०१९ मा फिल्म ‘बुलबुल’ निर्देशन गरेर राष्ट्रिय अवार्ड जितेका निर्देशक विनोद पौडेलले दोस्रो फिल्म ‘रबर सिटी’ घोषणा गरेका छन् ।

फिल्ममा ‘बुलबुल’का निर्माता अविरल थापाकै लगानी रहनेछ । उनका अनुसार आगामी मार्चमा यसको सम्पूर्ण छायांकन अमेरिकामै हुनेछ । फिल्ममा थापासँगै राजु पौडेल ,भक्त रिजाल, किर्तना बाँस्कोटा र यातिन पर्खानीको पनि लगानी रहनेछ । निर्माण पक्षले पाँच लाख डलर लगानी हुने दाबाी गरेको छ ।

फिल्मका लागि हालसम्म अभिनेता सशांक मैनाली र राधा लम्साल ‘भावु’ फाइनल भइसकेका छन् । बाँकी कलाकार नयाँ हुने निर्देशक पौडेलले बताए । निर्देशक पौडेलका अनुसार फिल्मले भुटानी शरणार्थीको पुनर्वासपछिको कथा भन्नेछ ।

फिल्मको कथा पटकथा पनि निर्देशक पौडेलले नै लेखेका हुन् भने अमेरिकामै रहेका अंकित पौडेलले यसको छायाकन गर्नेछन् ।