काठमाडौं–नेपाली हरर फिल्म ‘कठपुतली’ ले अमेरिकाको प्रतिष्ठित ‘इन्टरनेशनल विन्टर फिल्म फेस्टिभल’ दुई महत्वपूर्ण अवार्ड जितेको छ । सेप्टेम्बर २३ देखि अक्टोबर २ सम्म चलेको फेस्टिभलमा फिल्मले ‘वेस्ट हरर फिचर फिल्म’ र ‘इन्डी पिक्स अवार्ड’ जितेको हो ।

फेस्टिभलमा यो फिल्म ‘विन्टर फियर अवार्ड हरर फिल्म कम्पिटिसन’ विधामा छनोट भएको थियो । हरर विधातर्फ उत्कृष्ट बनेको यो फिल्मले जितेको ‘इन्डी पिक्स अवार्ड’अमेरिकाको ओटीटी प्लेटफर्ममा आधारित छ । यो अवार्ड जित्नु भनेको ‘इन्डी पिक्स’ ओटीटी प्लाटफर्मले रिलिजको लागि प्रस्ताव गर्नु हो । उक्त फेस्टिभलमा जम्मा चारवटा फिल्महरुले यो अवार्ड जितेका छन् ।

फिल्मका निर्माता पृथ्वी राना मगरले नेपाली फिल्मलाई अन्तर्राष्ट्रिय मञ्चमा लैजाने आफ्नो सपना पुरा भएको बताए । ‘यसका लागि मैले २० वर्षदेखि यात्रा सुरु गरेको थिएँ । कयौं पटक निराश पनि भएँ तर फिल्म निर्माणको जोश कहिल्यै कम भएन । यो अवार्डले फिल्म निर्माणमा थप हौसला दिएको छ,’ उनले भने ।

फिल्मका निर्देशक भीमसेन लामाले यो सफलताको लागि आफुलाई विश्वास गर्ने फिल्मको सम्पूर्ण टिम जिम्मेवार रहेको बताए । सम्पदा मल्लको कथा, पटकथा र संवाद रहेको फिल्ममा गौरी मल्ल, मिथिला शर्मा, कर्मा, शिल्पा मास्के, उषा रजक, सुवर्ण थापा लगायतको अभिनय छ । फिल्मलाई चाँडै नेपालमा प्रदर्शन गर्ने तयारीमा निर्माण टिम छ । अवस्था सामान्य बन्दै गएकाले आगामी पुस–माघसम्म फिल्मलाई रिलिज गरिने निर्माता मगरले बताए ।

फिल्मको सह–निर्मातामा विशाल गुरुङ, धर्म श्रेष्ठ र हेम थापा छन् । पृथ्वी राना प्रोडक्सनको ब्यानरमा फिल्म बनेको हो । पोस्ट प्रोडक्सनको सम्पूर्ण काम लण्डनको स्टूडियोमा भएको यो फिल्म प्रतिष्ठित ‘हर्टल्यान्ड इन्टरनेसनल फिल्म फेस्टिभल’मा समेत छनोटमा परेको छ ।