काठमाडौँ– नेकपा (एकीकृत समाजवादी) का अध्यक्ष माधवकुमार नेपालले पार्टीको आन्तरिक सर्कुलर गर्दै एमाले विभाजन गर्नुको औचित्य पुष्टि गर्ने प्रयास गरेका छन् । पार्टीको पहिलो अन्तर पार्टी निर्देशनमा एमाले अध्यक्ष केपी शर्मा ओली नमिलेपछि आफूहरुले बाध्यता भएर जायज विद्रोह गरेको अध्यक्ष नेपालले बताएका छन् ।

ओलीले एमालेको नवौं महाधिवेशनले तय गरेका कार्यदेश उल्लंघन गरेको, कम्युनिष्ट आन्दोलनलाई बदनाम गरेको, प्रतिनिधिसभा विघटन गरी प्रतिगामी कदम चालेको लगायतका आरोप लगाएका छन् ।

साथै अपानिमा सँयुक्त कार्यदलमा भएको १० बुँदे सहमति जालझेलमात्र भएको अध्यक्ष नेपालको विश्लेषण छ । उनले वार्तामा बसेका नेताहरुले ओलीको जालझेल बुझ्ने प्रयाससमेत नगरेको बताएका छन् । उनले कम्युनिष्ट आन्दोलनलाई जोगाउन पार्टी पुनःगठन गरिएकोसमेत बताएका छन् ।

अपानिमा ५ सदस्यीय स्थायी कमिटी र १२ जना नेतालाई प्रदेश र विभाग इन्चार्ज तोकिएको छ । यस्तै वरिष्ठ नेता झलनाथ खनालको संयोजकत्वमा दस्तावेज निर्माण समिति, गंगालाल तुलाधरलाई पार्टी केन्द्रीय कार्यालयको सचिव, राजेन्द्र पाण्डेलगायतका नेतालाई निर्वाचन आयोगबारे कामको जिम्मेवारी दिइएको छ ।

अपानिमा पार्टीको संगठन निर्माणलाईसमेत तिब्रता दिन निर्देशन दिइएको छ । राष्ट्रिय भेला गर्ने, प्रदेश, जिल्ला, स्थानीय स्तरमा पार्टीको संगठन निर्माण गर्ने, भेला बैठक गर्ने, संगठित सदस्यता वितरण गर्नेलगायतका निर्देशन दिइएको छ ।