काठमाडौँ– राष्ट्रिय सभा सदस्यहरुले राष्ट्रिय सभाको कामकारबाहीलाई प्रभावकारी बनाउदै लैजानुपर्नेमा जोड दिएका छन् ।

सिंहदरबारमा सोमबार बसेको राष्ट्रियसभा अन्तर्गतको विधायन व्यवस्थापन समितिको बैठकमा उनीहरुले राष्ट्रिय सभाको बैठक प्रभावकारी हुन नसकेको भन्दै गम्भीरताका साथ यसलाई प्रभावकारी बनाउनुपर्नेमा जोड दिएका हुन्।

बैठकमा राष्ट्रिय सभा सदस्य जितेन्द्र नारायण देवले राष्ट्रिय सभामा जनताको विषय वस्तुलाई प्रभावकारी रुपमा उठाउनुपर्ने बताए । राष्ट्रियसभामा भएका गल्ती कमजोरीलाई सच्याएर नै अघि बढ्नुपर्ने उनको भनाइ छ । उनले राष्ट्रिय सभा सदस्यहरु सांसदको भूमिका भन्दा पनि पार्टीको भूमिकामा बढी देखिएका कारण प्रभावकारिता हुन नसकेको टिप्पणी गरे ।

त्यस्तै अन्य सदस्यहरुले विभिन्न विधेयकमाथिको छलफललाई निरन्तरता दिनुपर्ने र राष्ट्रियसभाको छुट्टै औचित्य पुष्टि गर्ने बेला आएको धारणा राखेका थिए ।