काठमाडौ–अमेरिकी गैर सरकारी संस्था इन्ट्रा नेशनल वेलफेयर एण्ड सपोर्ट फाउण्डेशन अफ अमेरिकाद्वारा सञ्चालित राहत अभियान स्थगित गरिएको छ । नेपाली कलाकारहरु दीलिप रायमाझी, संजीत भण्डारी, रिचा थापालगायतको सहभागितामा फाउण्डेसनले काठमाडौं उपत्यका र जिल्लाहरुमा राहत प्रदान गरेको थियो ।

फाउण्डेशन अमेरिकाका प्रबन्ध निर्देशक रुद्र बानियाका अनुसार कोभिड–१९ पछि भएको लकडाउनका कारण अप्ठेरोमा परेकालाई प्रदान गरिँदै आएको राहत कार्यक्रम स्थगित भए पनि अन्य राहत कार्यक्रमहरु भने कायमै रहेको बताए । अभिनेता दीलिप फाउण्डेसनका नेपाल निर्देशक हुन् ।

अमेरिकामा सात वर्षदेखि सञ्चालित यो संस्था नेपालमा पनि दर्ता भएर सञ्चालित छ । अमेरिकामा दश हजार बढी सदस्य रहेको यो संस्थाका पदाधिकारीहरु अमेरिकाबाट नै नेपाल आएर राहतमा सहभागी बनेका थिए ।

फाउण्डेशनले अमेरिकामा रहेका नेपालीहरुलाई लक्षित गरी विभिन्न खेलकुदका कार्यक्रमहरु, मेरो डान्स कप अफ यूएसए, मेरो भ्वाईस कप यूएसए लगायतका विभिन्न सहयोगी कार्यक्रमहरु सञ्चालन गर्दै आएको छ ।

नेपालमा विगत तीन वर्षदेखि डे केयर होम सञ्चालन गरिरहेको र निकट भबिष्यमा नै झापा जिल्लामा वृद्दाआश्रम सञ्चालनमा ल्याउने तयारी रहेको संस्थापक अध्यक्ष डिल्ली अधिकारीले बताए ।

भुटानी शरणार्थी क्याम्पमा रहेका र तेस्रो मुलुक जान नमान्ने वृद्द वृद्दालाई मासिक पाँच हजार रुपैयाँ दिने घोषणा पनि अधिकारीले गरे । उनले राहतको कार्यक्रम नेपालमा लकडाउन सहज भएको कारणले बन्द गरिएको भएता पनि आवश्यक परेको खण्डमा फाउण्डेशन सँधै तयार रहने बताए ।