जनकपुरधाम– केही दिन यता प्रदेश २ मा कोरोना संक्रमितको संख्या बढ्न थालेको छ ।

गत महिनामा कोरोना संक्रमणको संख्या शून्य हुन लागे पनि भारतीय सिमानाकाबाट निर्वाध रुपमा भइरहेको आवतजावतका कारण प्रदेश २ का जिल्लाहरुमा पुनः कोरोना संक्रमितको संख्या बढ्न थालेको हो ।

दुई साता अगाडिसम्म प्रदेश २ का पाँच वटा जिल्लामा सक्रिय संक्रमितको संख्या शून्यसम्म पुगे पनि पछिल्लो समय संक्रमितको संख्यामा वृद्धि भएको स्वास्थ्य निर्देशनालयले जानकारी दिएको छ ।

हाल प्रदेश २ मा ५६ जना सक्रिय संक्रमित रहेको स्वास्थ्य निर्देशनालय प्रदेश २ का निमित्त निर्देशक विजयकुमार झाले जानकारी दिए ।

सप्तरी, सिरहा, धनुषा, महोत्तरी र सर्लाही जिल्लामा केही दिनअघिसम्म सक्रिय संक्रमितको संख्या शून्य भएको थियो ।

सोमबार थप ७ जनामा कोरोना संक्रमण पुष्टि भएको छ । यससँगै प्रदेश २ मा कोरोना संक्रमितको कुल संख्या १७ हजार २ सय ५७ पुगेको डा. कमलेश प्रसाद यादवले जानकारी दिए ।

उनका अनुसार धनुषामा ३, पर्सामा २, बारामा १ र अन्य प्रदेशका १ जना गरी ७ जनामा कोरोना संक्रमण पुष्टि भएको हो ।

पर्सामा सबैभन्दा बढी ३१ जना सक्रिय संक्रमित रहेका छन् । त्यस्तै धनुषामा १०, बारामा ९, महोत्तरीमा २, सप्तरी, सिरहा, सर्लाही र रौतहटमा १-१ जना कोरोनाका सक्रिय संक्रमित रहेको स्वास्थ्य निर्देशनालयले जानकारी दिएको छ ।