काठमाडौँ– ‘सम्पर्क भारत नेपाल’ले काशी-प्रवासमा रहेका नेपालीहरूको सम्झनामा ‘काशीको सम्झना’ कार्यक्रम गर्ने भएको छ ।

भारतीय दूतावास, स्वामी विवेकानन्द सांस्कृतिक केन्द्रले काठमाडौँमा मंगलबार उक्त कार्यक्रमको गर्न लागेको हो । दिउँसो ३ : ३० देखि अपराह्न ५ :३० बजे सम्म उक्त कार्यक्रम सामाजिक सञ्जाल फेसबुक मार्फत प्रत्यक्ष प्रसारण गरिने दूतावासले जनाएको छ ।

कार्यक्रममा कांग्रेस महामन्त्री डा. शशांक कोइराला, साहित्यकार दुर्गाप्रसाद श्रेष्ठ, किरण मानन्धर लगायतको सहभागीता रहनेछ । उनीहरुसँग प्रवास संस्मरणबारे इला शर्माले संवाद गर्ने जनाइएको छ । संवादमा उनीहरुले शैक्षिक मातृ संस्था एवं काशी शहरमा बिताएका आफ्ना अनुभव सुनाउनेछन् ।

‘काशीको सम्झना’ श्रृंखलाले सन १९२० देखि १९८० सम्मको दशकहरुलाई मात्र समेट्ने आयोजकले जनाएको छ ।

‘सम्पर्क भारत नेपाल’ले भारतमा शिक्षा हासिल गरेका नेपालीहरुलाई एउटै मन्चमा ल्याउने प्रयास गरिरहेको छ । यस संगठनले नेपाल-भारत सम्बन्धका विषयमा बौद्धिक, सांस्कृतिक एवं सामाजिक क्रियाकलाप गर्दै आएको छ ।