काठमाडौँ– नेकपा एमालेका उपाध्यक्ष वामदेव गौतमले पार्टी अध्यक्ष केपी ओली र वरिष्ठ नेता माधवकुमार नेपालले रिस नत्यागेसम्म आफूले पार्टी एकता सम्भव नदेखेको बताएका छन् ।

राष्ट्रिय सभाको बैठकपछि सङ्घीय संसद् भवन नयाँ बानेश्वरमा सञ्चारकर्मीलाई संक्षिप्त प्रतिक्रिया दिँदै नेता गौतमले अध्यक्ष ओली र वरिष्ठ नेता नेपालले एक–आपसमा रिस नत्यागे एकता सम्भव नहुने बताएका हुन् । उनले पार्टीभित्रको विवाद समाधानका लागि दोस्रो तहका नेताहरुले प्रयास पनि सार्थक नहुने देखिएको प्रतिक्रिया दिए ।

उनले पार्टी एकताका लागि आफ्नो प्रयास  भने जारी रहेको उनले बताए ।

उहाँले भन्नुभयो, ‘एकै ठाउँ भएपछि त एकताको आवश्यकता नै पर्दैन नि । दुईतिर-तिनतिर बाँडिएकाहरूलाई नै एकता गराउने हो । अहिले हाम्रो पार्टीमा माधव, झलनाथ एकातिर केपी एकातिर हुनुभयो । पार्टी एकता गराउनकै निम्ति भनेर म केपी ओलीतिर लाग्या छु । मैले एकताको प्रस्ताव अस्ति केन्द्रीय कमिटीको बैठकमा राखेँ । हलले नै मलाई एकताको प्रयत्न मुख्य कुरा वामदेवले गर्नुपर्छ भन्ने पास गरेको छ । यस्तो बेलामा नआत्तिकन सबै साथीहरूलाई धैर्यधारण गरेर प्रत्यन्त गर्नुहोस् भनेर मैले अरूलाई भनेको छु । पार्टी एकताका  लागि प्रयत्नशील छु ।’